ഭക്ഷണശാലകളുടെ ലോകത്ത് വിസ്മയമായി ആശാ ഭോസ്‌ലേ, സംഗീതംപോലെ മധുരിക്കുന്ന ഭക്ഷണ സംരംഭം

ഗായിക എന്ന നിലയിൽ എല്ലാത്തരം പാട്ടുകളും പാടി നമ്മെ വിസ്മയിപ്പിച്ച ആശാ ഭോസ്ലേ, ഭക്ഷണത്തോടുള്ള തന്റെ ഇഷ്ടം ഒരു വലിയ സംരംഭമാക്കി മാറ്റിയിരുന്നു.  'ആശാസ്'  എന്ന പേരിൽ അവർ തുടങ്ങിയ റെസ്റ്റോറന്റ് ശൃംഖല ഇന്ന് ലോകപ്രശസ്തമാണ്. ഇന്ത്യയിലെ പരമ്പരാഗത വിഭവങ്ങൾ പുതുമയോടെ വിളമ്പുന്നതിലാണ് ഈ റെസ്റ്റോറന്റുകൾ ശ്രദ്ധ കേന്ദ്രീകരിക്കുന്നത്.

 ദുബായിലെ വാഫി സിറ്റിയിലാണ് ഇതിന്റെ പ്രധാന ശാഖയുള്ളത്. കൂടാതെ കുവൈറ്റിലെ പ്രശസ്തമായ അവന്യൂസ് മോൾ, മറീന മോൾ എന്നിവിടങ്ങളിലും ശാഖകളുണ്ട്. അബുദാബി, ദോഹ, ബഹ്‌റൈൻ തുടങ്ങിയ സ്ഥലങ്ങളിലും ആശാസ് റെസ്റ്റോറന്റുകൾ പ്രവർത്തിക്കുന്നുണ്ട്. വിനോദസഞ്ചാരത്തിനും കച്ചവടത്തിനും പ്രാധാന്യമുള്ള വലിയ നഗരങ്ങളിലാണ് ഇവ പ്രധാനമായും സ്ഥിതി ചെയ്യുന്നത്.

കെയ്‌റോ, ദുബായിലെ കൂടുതൽ സ്ഥലങ്ങൾ എന്നിവിടങ്ങളിലേക്ക് ഈ ബിസിനസ്സ് വ്യാപിപ്പിക്കാൻ അവർക്ക് പദ്ധതിയുണ്ടായിരുന്നു.സംഗീത ലോകത്തെപ്പോലെ തന്നെ ഭക്ഷണ ലോകത്തും തന്റേതായ ഒരു മുദ്ര പതിപ്പിക്കാൻ ആശാ ഭോസ്ലേയ്ക്ക് ഈ സംരംഭത്തിലൂടെ സാധിച്ചു.മറ്റ് പല സെലിബ്രിറ്റികളെയും പോലെ വെറുതെ പേരിന് വേണ്ടിയല്ല ആശാ ഭോസ്‌ലേ ഈ ബിസിനസ് നടത്തുന്നത്. ഇതിന്റെ ഓരോ കാര്യത്തിലും അവർക്ക് കൃത്യമായ പങ്കുണ്ട്.

ഉടമസ്ഥാവകാശം

 ഈ ബിസിനസിന്റെ 20 ശതമാനം ഓഹരികൾ  ആശാ ഭോസ്‌ലേയുടെ കൈവശമാണ്. റെസ്റ്റോറന്റിന്റെ പേര് നൽകുന്നതിലുപരി, അതിന്റെ സ്വഭാവം നിശ്ചയിക്കുന്നതിൽ അവർ വലിയ പങ്കുവഹിക്കുന്നു. റെസ്റ്റോറന്റിലെ അടുക്കളയിലെ കാര്യങ്ങളിലും,ഭക്ഷണത്തിന്റെ രുചി ഉൾപ്പെടെ, അവിടുത്തെ അലങ്കാരപ്പണികളിലും  അവർ നേരിട്ട് ശ്രദ്ധിക്കാറുണ്ട്. റെസ്റ്റോറന്റിന്റെ ദൈനംദിന പ്രവർത്തനങ്ങൾ നടത്തുന്നത് വാഫി ഗ്രൂപ്പ്  ആണെങ്കിലും, പ്രധാന തീരുമാനങ്ങളിൽ ആശാ ഭോസ്‌ലേയുടെ സാന്നിധ്യമുണ്ട്.

അംഗീകാരം

മാഞ്ചസ്റ്ററിലെ റെസ്റ്റോറന്റിന് 2017-ൽ ലോകപ്രശസ്തമായ മിഷ്‌ലിൻ ഗൈഡിന്റെ അംഗീകാരം ലഭിച്ചു. യുകെയിലെ മികച്ച ഇന്ത്യൻ ഭക്ഷണശാലകളുടെ പട്ടികയിൽ ഇടംപിടിക്കാൻ ഇത് സഹായിച്ചു.2017-ൽ മാഞ്ചസ്റ്ററിലെ ശാഖയ്ക്ക് ലഭിച്ച അംഗീകാരം ഈ ബ്രാൻഡിന്റെ ചരിത്രത്തിലെ ഒരു വലിയ നാഴികക്കല്ലായിരുന്നു. ഗായിക എന്ന നിലയിൽ മാത്രം ഒതുങ്ങി കൂടാതെ ഒരു സംരംഭക എന്ന നിലയിലും ആശ ഭോസ്ലെ തിളങ്ങിയിരുന്നു എന്ന കാര്യം അവർ അന്തരിച്ചപ്പോഴാണ്  പലരും തിരിച്ചറിയുന്നത്. 

Content Highlights: Discover the inspiring journey of Asha Bhosle as a successful entrepreneur. Learn about her international restaurant chain 'Asha’s', her hands-on involvement, and the brand's global expansion from Dubai to the UK.